Клековски: Здравството во Македонија со соодветни издвојувања, но со високи очекувања од граѓаните
Директорот на Фонд за здравствено осигурување на Македонија, Сашо Клековски, во емисијата „Ноќно студио“ на 4ТВ говореше за издвојувањата за здравството и предизвиците со кои се соочува системот.
Клековски посочи дека податоците за месечните издвојувања од околу 3000 денари се однесуваат на носителите на осигурување, додека ако се вклучат и сите осигурени лица, просечниот износ изнесува околу 2000 денари, односно приближно 35 евра месечно. На годишно ниво, носителите издвојуваат околу 600 евра, додека просекот по осигуреник е околу 420 евра.
Според него, издвојувањата за здравство, кои достигнуваат околу 13 проценти од јавните финансии, се соодветни ако се земе предвид економскиот развој на државата. Сепак, тој нагласи дека тоа не е доволно за да се задоволат растечките очекувања на граѓаните.
„Граѓаните денес не се задоволуваат со просек – тие го бараат најдоброто што постои на европско и светско ниво“, истакна Клековски, додавајќи дека главниот предизвик е како со постојните ресурси да се обезбеди максимален квалитет на здравствени услуги.
Тој објасни дека здравствениот систем во Македонија функционира како хибриден модел, во кој значаен дел од услугите ги обезбедуваат приватни здравствени установи со договор со фондот. Примарното здравство, вклучително матичните лекари, гинеколози и стоматолози, во најголем дел е во приватниот сектор, додека дел од специјалистичките и лабораториските услуги исто така се обезбедуваат преку приватни капацитети.
Иако најголемиот дел од средствата се насочуваат кон јавното здравство, Клековски посочи дека во услови на недостатоци, фондот користи и услуги од приватниот сектор со цел да се обезбеди континуитет во здравствената заштита.
Тој оцени дека, и покрај предизвиците и стагнацијата во изминатата деценија, поставениот систем претставува солидна основа за понатамошни реформи и подобрувања во здравството.
