Касами: Владината коалиција останува отворена за нови партнери од Европскиот фронт
Претседателот на Движењето Беса, Биљал Касами, денеска од Тетово најави можност за проширување на владината коалиција со нови политички партнери од редовите на Европскиот фронт.
Одговарајќи на новинарско прашање за тоа кому ќе му припадне функцијата заменик министер за одбрана, Касами посочи дека дел од владините позиции се оставени како простор за потенцијални приклучувања на нови пратеници и партии.
„Ние и претходно сме кажале – коалицијата е отворена. Сме во разговори со неколку пратеници и партии кои се дел од Европскиот фронт, и многу брзо очекуваме конкретни резултати. Некои од испразнетите функции, како таа во Министерството за одбрана, се резервирани за тие нови партнерства“, изјави Касами.
Тој не прецизираше кои партии се во прашање, но рече дека преговорите се во напредна фаза.
Пред оваа изјава, Касами во својство на градоначалник на Тетово одржа прес-конференција на која го претстави Јавниот повик за доделување еднократна финансиска помош (ваучери) за социјално загрозени лица во 2025 година.
