КАКВА ЕКИПА ЌЕ ГО ВОДИ ГТЦ? Има сметководител, државен инспектор, менаџер на скопски хотел, државни и општински чиновници и раководител во ЦУК…
Скопската државна компанија ќе добие нов состав на Управниот одбор. Составот е разнолик и на прво гледање тешко се наоѓа НЗС меѓу неговите нови членови кои сега се предлози за кои ќе гласа доминантниот акционер државното АД за деловен простор.
Според достапните податоци предлозите за нови членови на Одборот на директори се следниве:
Александар Тасев од Валандово, сметководител од Валандово, вработен во компанија „Валетас“. Тасев дипломирал и магистрирал на Правниот факултет на државниот УКИМ.
Негов колега во управата на ГТЦ ќе биде Јован Лукаров од Радовиш. Дипломиран економист завршил на државниот економски факултет во Прилеп. Има десет годишно работно искуство во Управата за имотно-правни работи на Министерството за финансии, а од септември годинава се вработил во државното АД за стопанисување со деловен простор. Во биографијата навел и дека од 2017 до 2021 година бил член на Советот на Општина Радовиш.
Катица Грче од Скопје е инженер – технолог која 13 години е државен инспектор за храна во Агенцијата за храна и ветеринарство.
Никола Соколовски од Скопје по вокација е магистар на економски науки произведен на светиниколскиот Меѓународен славјански универзитет. Во последниве две години е оперативен директор на скопскиот „Интернешнл хотелс“ (поранешен „Континентал“ н.з.), а во претходните години ги поминал сите скалила во кариерно напредување во тој скопски хотел во кој почнал да работи во 2010 година.
Неговиот сограѓанин Васе Ангеловски доаѓа во управниот одбор на ГТЦ од Општина Кисела Вода. Во неговото скудно и јавно достапно Си-Ви (C.V.) не е наведено на која позиција работел во таа општина. Не навел на кој факултет дипломирал, но навел дека дипломирал од областа на безбедноста, мирот и одбраната.
И неговата колешка од Општина Кисела Вода Виолета Блажевска доби фотелја во управниот одбор на ГТЦ. Во нејзиното Си-Ви пишува дека од 2013 година до сега работи како помлад соработник од Одделението за планирање на просторот и е-кат услуги.
Од биографијата на Блажевска е видно дека има два факултети. Едниот е родови студии на државниот УКИМ во Скопје, е другиот е менаџмент по човечки ресурси на Универзитетот за туризам и менаџмент во Скопје.
„Најисцрпна“ биографија дал кандидатот за член на управниот одбор Белули Јетула Ферик. Тој е професор по одделенска настава дипломиран на педагошкиот факултет при УКИМ. Вработен е во Центарот за управување со кризи (ЦУК) каде работи како раководител на Секторот за поддршка на директор и заменик директор.
Сите јавно достапни детали за новите директори на ГТЦ се достапни на следниот линк https://seinet.com.mk/document/70417
Р.Ф.
