Кадетите ја растурија Црна Гора, победа за „главна рунда“ за Македонија!
Првиот дел заврши со 12-10, но веќе во почетните 10 минути од вториот, Македонија врза серија од четири постигнати и само еден примен гол, за да поведе со 17-12 во 40. минута. Тоа беше далеку највисокото водство дотогаш на мечот, имајќи предвид дека тој беше многу резервиран и изедначен во првиот полчас.
Почна со исклучително цврсти одбрани и расположени голмани и на двете страни, па Македонија првиот гол го прими по точно 10 минути игра, кога Црногорците намалија на 1-2. По долга игра гол за гол, наталоживме само плус два до големиот одмор, но вистинскиот однос на силите се покажа во вториот дел.
По таа 40. минута, противникот се обиде да се врати, намали на минус три, но избраниците на Раде Стојановиќ беа извонредни во одбраната, поведени од брилијантниот Давид Брестовац, кој бранеше како во транс. Им овозможи нова серија од 4-0 на соиграчите, по која Македонија првпат дојде на плус седум, 24-17 во 50. минута, а на него се надоврза и Иван Галевски, кој фати пенал. Победникот беше јасен, а конечните плус девет беа најголема разлика на мечот.
Фактот што ниту еден ракометар не постигна повеќе од три гола, говори за совршено тимски пристап, а со по три погодоци предничеа Марио Стојановски, Томислав Димковски, Славчо Шулевски, Ненад Белистојановски и Самоил Ристевски. Сепак, вистински херој беше Давид Брестовац со 13 одбрани и 46-процентна успешност, поради што беше прогласен за играч на мечот. Галевски придонесе со пет интервенции и еден постигнат гол.
Овој триумф беше многу важен, веројатно клучен за Македонија да го освои второто место во групата во која се уште Норвешка и Грузија. Во последното коло, утре од 17.30 играме против Грузијците, но имајќи предвид дека тие загубија со 19-34 од Црна Гора, победата не би требало да биде ставена во прашање, а со тоа и пласманот во главната рунда. Таму Македонија ќе вкрсти со Австрија и со Данска, како најдобри селекции од групата Е.
