КАДЕ ЗГРЕШИ „ТАЈМИШТЕ“ ОД КИЧЕВО – компанијата заработи долгорочна суспензија од берзанската котација
Берзата излезе со остра мерка за една од котираните компании на пазарот на капитал.
Имено, за кичевската компанија „Тајмиште“ Берзата изрече мерка долгорочна суспензија од котација, која ќе трае најмалку еден месец.
Ова кичевско акционерско друштво континуирано не ги исполнувало обврските што со себе ги носи котацијата.
„Ве известуваме дека согласно Одлука на Одборот на директори на Македонска берза АД Скопје, на друштвото Тајмиште АД Кичево, котирано на Официјалниот пазар на Берзата, на потсегментот Задолжителна котација, му е изречена мерка долгорочната суспензија од котација, поради континуирано неисполнување на обврските согласно Правилата за котација. Мерката долгорочна суспензија од котација се изрекува за период од најмалку 30 дена од денот на суспендирање, а тоа е 28 јули годинава, и трае до отстранување на причините поради кои е изречена оваа мерка.
За времетраењето на долгорочната суспензија од котација издавачот Тајмиште АД Кичево не го губи статусот на котирано друштво, но е должен во односите со трети лица и во јавноста да истакнува дека е долгорочно суспендиран од котација на Берзата. Воедно, за времетраење на мерката долгорочна суспензија, Тајмиште АД Кичево нема постојани обврски за известување согласно Глава VI од Правилата за котација“, се вели во објавата од Берзата.
За времетраење на мерката долгорочна суспензија, хартиите од вредност издадени од Тајмиште Кичево се тргуваат на Редовниот пазар на Берзата, на подсегментот Слободен пазар, при што за издавачот важат законските обврски за известување за тој подсегмент.
Со донесената Одлука за долгорочно суспендирање од котација се укинува Одлуката од 30.06.2022 година за внесување на Тајмиште АД Кичево на Листата за набљудување и врз основа на тоа издавачот се брише од Листата за набљудување.
