Кабинет на Пендаровски: Претседателот мора да има обезбедување и да користи службено возило
По објавувањето во медиумите во текот на вчерашниот ден дека актуелниот претседател и кандидат од СДСМ, Стево Пендаровски со службено возило и обезбедување го посетил штабот на СДСМ во Штип, се јавија со реакција и од Кабинетот на претседателот.
Според нив, Пендаровски е актуелен претседател на државата и за него важат посебни прописи за заштита на личноста.
„Посебните правила се уредени во Уредбата за личностите и објектите што се обезбедуваат, видовите на мерки и активности и степените на обезбедување, донесена од Владата, согласно со Законот за полиција, уште во 2014 година“, велат од таму.
Тие велат дека овие правила важат за целото време на извршување на функцијата и нагласуваат дека согласно со член 8-б, став 1 од Изборниот законик, овие правила за Претседателот важат и за време на изборната кампања.
„Потсетуваме дека Претседателот на државата не е член на ниту една партија и е подготвен да има средба со секоја политичка партија доколку има такво барање или покана, како што практикува од стапувањето на должноста во 2019 година“, додаваат од Кабинетот на претседателот.
