Израелскиот парламент усвои декларација против едностраното признавање на палестинската држава
Израелскиот парламент (Кнесет) денеска усвои декларација против формирање на палестинска држава, токму во време на се почести меѓународни повици за модел на две држави за да се постигне решение на деценискиот конфликт меѓу Израел и Палестинците.
Конзервативната партија Ликуд на Нетанјаху соопшти дека 99 од 120 пратеници ја поддржале декларацијата што неодамна ја усвои владата, пренесоа израелските медиуми.
Ставот на Израел е и дека каков било траен договор со Палестинците треба да се постигне преку директни преговори меѓу двете страни, а не со меѓународни диктати.
Лидерот на израелската опозиција Јаир Лапид, лидер на централната партија Јеш Атид (Има иднина), гласаше за декларацијата и им рече на пратениците дека не верува дека има намера на САД еднострано да признае палестинска држава.
Напорите за постигнување решение засновано на моделот на две држави, со формирање на палестинска држава на Западниот Брег и во Појасот Газа до Израел, се во застој од 2014 година.
Нетанјаху оцени дека едностраното признавање на палестинската држава по масакрот на 7 октомври ќе биде голема награда за тероризмот, награда без преседан и ќе спречи каков било иден мировен договор.
Велика Британија, САД и другите западни земји ја поддржаа идејата за независна палестинска држава, но порачаа дека палестинската независност треба да биде дел од решението што ќе се постигне на преговарачка маса.
Израелскиот лидер постојано ја отфрла можноста за создавање независна палестинска држава по завршувањето на војната против Хамас.
Американскиот претседател Џозеф Бајден се обидува да го олесни постигнувањето на поширок договор на Блискиот Исток кој би ги вклучил Саудиска Арабија и другите арапски земји, кој наводно би ги нормализирал односите со Израел, а истовремено ќе создаде палестинска држава.
