Израел предлага поблаги мерки за носење оружје
Кабинетот за безбедност на ИЗРАЕЛ одобри мерки за полесно носење оружје на Израелците по двата одделни напади на Палестинците во Ерусалим оваа недела, јавува Би-Би-Си, додавајќи дека целосниот кабинет ќе ги разгледа предложените мерки во недела.
„Кога цивилите имаат оружје, тие можат да се одбранат“, изјави контроверзниот екстремно десничарски министер за национална безбедност Итамар Бен-Гвир за новинарите пред болницата во Ерусалим. Новите мерки вклучуваат одземање на правото на престој и социјална сигурност на членовите на семејството на напаѓачот.
Премиерот Бенјамин Нетанјаху вети „силен“ и „брз“ одговор на состанокот на безбедносниот кабинет. „Нашиот одговор ќе биде силен, брз и прецизен“, рече Нетанјаху. „Не сакаме ескалација, но подготвени сме на секое сценарио.
Тој најави „забрзан процес“ на запечатување и рушење на куќите на извршителите на антиизраелските напади, што невладините организации за човекови права го нарекуваат колективна казна. Тој, исто така, им се заблагодари на неколку светски лидери за нивната поддршка, вклучувајќи го и американскиот претседател Џо Бајден.
Предлозите се во согласност со оние на екстремно десничарските политички сојузници на Нетанјаху, кои му помогнаа да се врати на власт минатиот месец. Израелската армија најави дека дополнителни трупи ќе бидат распоредени на окупираниот Западен Брег.
Соопштението дојде откако израелската полиција соопшти дека 13-годишно палестинско момче стои зад пукотницата во ерусалимската населба Силван во саботата, во која татко и син Израелци беа тешко ранети.
Во одвоено пукање во петокот во синагога во источен Ерусалим, седум лица беа убиени, а најмалку три други беа ранети додека се собраа на молитва на почетокот на еврејската сабота. Напаѓачот е убиен на лице место.
Човекот зад петочниот напад во синагога беше идентификуван од локалните медиуми како Палестинец од Источен Ерусалим. Полицијата уапси 42 лица поврзани со тој напад. Пукањето во синагогата се случи на Меѓународниот ден на сеќавање на холокаустот.
Израелскиот полициски комесар Коби Шабтаи го нарече „еден од најлошите напади со кои сме се соочиле во последните години“. Палестинските милитантни групи го пофалија нападот, но не презедоа одговорност за него.
Тензиите се високи откако девет Палестинци – и милитанти и цивили – беа убиени за време на израелски воен напад во Џенин на окупираниот Западен Брег во четвртокот. Потоа следеше израелски ракетен истрел од Газа, на што Израел одговори со воздушни напади.
Од почетокот на јануари, 30 Палестинци – милитанти и цивили – се убиени на Западниот Брег. Палестинскиот претседател Махмуд Абас ги суспендираше договорите за безбедносна соработка со Израел по рацијата во Џенин во четвртокот.
