ИЗДАВАЛЕ СМЕСТУВАЊЕ, АМА НЕ ПЛАЌАЛЕ ДАНОК: Србија размислува да го укине booking
Луѓето во Србија кои ги издаваат становите преку букинг не плаќале данок.
Букинг (Booking), онлајн платформа за резервации на апартмани и хотели низ светот, во Србија се соочува со обвинувања од властите за огласување на нерегистрирани даватели на приватно сместување, односно станови кои нивните сопственици ги издаваат, а не плаќаат данок.
Од Министерството за туризам посочуваат дека оваа платформа овозможува промоција на субјекти кои не работат во согласност со законот, додека од Букинг одговараат дека е подготвена да ги едуцира давателите на сместување за нивните обврски, но и нешто повеќе од ова, јави дописникот на МИА од Белград.
Минатата недела министерот за туризам Хусеин Мемиќ објасни дека „во туризмот, кој постојано се развива и носи сè поголем девизен прилив, има многу сива економија, а најголем проблем се корисниците на приватното сместување и странски платформи кои во Србија работат на црно“.
Посебно внимание е насочено кон платформата Букинг, на која министерот посочи дека се воделе разговори со таа компанија, како и дека државата размислува да го укине работењето на оваа компанија во Србија.
Од Министерството за порталот Нова економија потврдија дека се остварени средби со регионални претставници на Букинг и дека по тој повод е дадено предлог решение во форма на барање за единствен матичен број (JID) на регистрирани угостители од Е-турист, при склучување на договор за огласување помеѓу угостителите и Букинг.
Директорот на Националната асоцијација на туристички агенции на Србија (ЈУТА), Александар Сеничиќ одговори дека државата треба да разговара со нив за промена на правилата на оваа компанија, но дека во случај тоа да не вроди со плод, забраната за работа на оваа компанија „нема да биде првиот прекин на работата на територијата на една земја, барем привремено“.
Вели дека Турција имаше долг спор со Букинг поради појавата на нелојална конкуренција и на крајот успеа да инкасира неколку милиони евра обесштетување, а компанијата привремено го „затвори“ своето работење таму.
foto freepik.com
