ИСТРАГА ЗА „ВЛАДИНОТО БИФЕ“: Каде исчезна храна вредна 70.000 евра?
Министерството за внатрешни работи, односно Бирото за јавна безбедност, отвори истрага за сериозен кусок во магацините на владините бифеа. Станува збор за прехранбени производи во вредност од околу 4,2 милиони денари (70.000 евра), кои според документацијата фигурирале како залиха, но во реалноста ги немало.
Скандалот излезе на виделина по објавувањето на извештајот на Државниот завод за ревизија (ДЗР) за работата на Службата за општи и заеднички работи (СОЗР). Пописот извршен во 2024 година покажал драстична разлика помеѓу сметководствената евиденција и фактичката состојба во магацинот.
Актуелниот директор на СОЗР, Ивица Томовски, потврди дека постојат неправилности, но се воздржа од подетални коментари поради активноста на истражните органи.
„Има некакви разлики, точно е тоа. Не би сакал да навлегувам во детали бидејќи Бирото за јавна безбедност при МВР води постапка. Да оставиме на институциите да го разрешат случајот“, изјави Томовски.
Овој случај отвора сериозни прашања за контролните механизми во службата која е задолжена за логистичка поддршка на највисоките државни органи.
