Интерната комисијата откри 10 непотребни кардиолошки операции: Случаите одат на дополнителна анализа
Од вкупно 25 пристигнати случаи, Интерната комисија за кардиолошки и кардиохируршки интервенции досега анализирала 19. Кај 10 од нив било утврдено дека операциите биле непотребно извршени или пациентите биле неоправдано упатени на хируршка интервенција, соопшти денеска министерот за здравство Азир Алиу на прес-конференција.
Алиу информира дека кај шест од пријавите комисијата утврдила дека нема надлежност и дека тие предмети ќе бидат проследени до Државниот санитарен и здравствен инспекторат.
Претседавачот на комисијата, д-р Жарко Христовски, појасни дека во првата фаза биле обработени само случаи поврзани со проценка за потреба од реваскуларизација кај пациенти со васкуларни заболувања, без оглед дали станува збор за кардиолошки или периферни состојби. Останатите пријавени случаи ќе бидат разгледувани дополнително, во следните фази од работата.
„Одлуките ги носевме врз основа на достапната медицинска документација, според пријавите од пациентите до Фондот за здравствено осигурување, како и од здравствените установи до Фондот и Министерството за здравство. Резултатите од оваа првична анализа ќе ги споделиме и со меѓународната комисија што ја очекуваме да пристигне по покана на Министерството, со цел дополнителна обработка на случаите кај кои утврдивме проблематична индикација за интервенција“, изјави Христовски.
Тој додаде дека во следната фаза ќе се спроведе и анализа на работа на институциите што се занимаваат со кардиоваскуларна медицина, согласно стратегија што ќе биде усвоена на следниот состанок на комисијата. Целта е да се направи поширока проценка на третманите на пациенти со кардиоваскуларни заболувања и да се предложат мерки за нивно унапредување.
„Интеграцијата на јавното и приватното здравство, заедно со размена на информации и усогласување на стратешките пристапи, треба да резултира со конкретни заклучоци за подобрување на третманот. Засега, кај 10 случаи утврдивме прекстензивно поставена индикација, кои ќе продолжат да бидат предмет на анализа. По формирањето на меѓународната комисија и деталниот увид во медицинската документација, ќе донесеме финални заклучоци и ќе предложиме соодветни понатамошни чекори“, додаде Христовски.
