Институтот за војна предупредува: Русите се подготвуваат за војна против друга земја?
Рускиот отцепен регион Придњестровје би можел да одржи референдум за приклучување кон Русија на најавениот Конгрес на пратениците на Приднестровје закажан за 28 февруари, според Институтот за проучување на војната (ISW).
Изговор за таков повик би била наводната потреба да се заштитат руските граѓани и сонародници во Придњестровје од заканите од Молдавија или НАТО или од двете.
Рускиот претседател Владимир Путин би можел, во најлошото сценарио, да ја објави анексијата на Придњестровје за време на неговото планирано обраќање пред Федералното собрание на Русија на 29 февруари, иако тоа изгледа малку веројатно, според ISW. Поверојатно е Путин да ја поздрави секоја акција преземена од Конгрес на пратеници во Придњестровје.
Молдавија е поранешна советска држава лоцирана меѓу Романија и Украина и има околу 2,6 милиони жители. Молдавскиот парламент има прозападно мнозинство, а прозападната претседателка на Молдавија, Маја Санду, се залага за пристапување на Молдавија во Европската унија.
Нејзината влада ги подобри односите со ЕУ откако ја презеде функцијата во 2020 година, при што лидерите на ЕУ и доделија кандидатски статус на Молдавија во јуни 2022 година.
Придњестровје е проруски отцепен регион во источна Молдавија со население од околу 470.000 луѓе кои незаконски прогласија независност од Молдавската Советска Социјалистичка Република во 1990 година.
Ниту една членка на Обединетите нации (ОН) не го признава нејзиниот суверенитет, а ОН го сметаат регионот за дел од Молдавија.
Кремљ историски доминира во геополитичката ориентација на Молдавија преку проруските политички поддржувачи во молдавската влада. Москва, исто така, би можела да го искористи Придњестровје како место од каде ќе спроведува хибридни воени операции против Молдавија, Украина и НАТО.
На крајот, според ISW, Кремљ би можел да се обиде да ја дестабилизира Молдавија преку Придњестровје со цел да создаде криза на југоисточното крило на НАТО.
