ИМА СОМНЕЖИ ДЕКА СЕ ПОДМЕТНАТИ: Пожари и во Србија, две села се загрозени

И кај северниот сосед има пожари за кои постојат сомнежи дека се подметнати. Пожарникарите веќе два дена водат голема битка да ги стават под контрола шумските пожари на југоистокот на Србија, јави Би-Би-Си на српски јазик.

Огнот зафатил неколку стотини хектари во тој регион, јавува Радио-телевизија Србија (РТС).

„Најголемите пожари во моментот се на подножјето на врвот Видлич на Стара Планина, во општините Димитровград и Пирот, на границата со Бугарија“, информира Министерството за внатрешни работи на Србија.

Две села во таа област се загрозени затоа што огнот се приближува. Се распламтил и пожар во општина Жагубица. Полицијата се сомнева дека пожарите се подметнати. Пожарот на Видлич го гасат вкупно 120 лица – пожарникари и работници од Јавното претпријатие „Србијашуме“, а ангажирани се и хеликоптери. Општина Димитровград наскоро би можела да прогласи вонредна состојба, јавува РТС. Ситуацијата е сложена затоа што се работи за исклучително непристапен терен.