Има ли поскромен извршен директор во Македонија? Ќе добие 2.300 евра награда, а води фирма што направи 810.000 евра профит

Интересно е тоа што за наградата на Ѓорѓи Стојанов извршниот директор на БИМ Свети Николе, одлучува најголемиот акционер Стојанче Стојанов, кој воедно е и претседател на Одборот на директори на единствената македонска компанија која произведува битумен и изолациски материјали

Ѓорѓи Стојанов веројатно е најскромниот извршен директор во Македонија. Овој менаџер оперативно ја води единствената македонска компанија за изолациски материјали изработени од битумен БИМ од Свети Николе, успешна домашна фирма која минатата година ја заврши со профит од 810.000 евра.

Во една од предлог одлуките за претстојното акционерско собрание меѓу другото е предвидена награда на извршниот директор на компанија во износ од 2.300 евра.

За да се долови вредноста на наградата мора да се даде контекст кој е составен од другите ставки на истата предлог одлука која ја распределува добивката за 2022 година. А тие ставки се: дивиденда за сите акционери во износ од 288.000 евра, потоа нови инвестиции во вкупна вредност од 256.000 евра, наградата за извршниот директор во бруто износ (со вклучен данок) од 2.300 евра и нераспределена добивка во износ од 263.000 евра.

Структурата на распределба на добивката за 2022 година кај секој инвеститор во акции ќе прати порака дека таа акција заслужува внимание затоа што вреди да се вложи во фирма која домаќински ја распределува добивката и во која извршниот директор оствен плата и надоместоци добива награда која е 0,3 отсто од добивката.

БИМ е домашна компанија која освен што работи успешно има висока репутација како редовен доделувач на дивиденда на своите акционери. Годинава тие меѓусебно ќе поделат 288.000 евра, а секоја акција носи нето износ на дивиденда од 1.650 денари (27 евра по акција).

Најголем акционер во таа компанија е Стојанче Стојанов кој е претседател на Одборот на директори и поседува 53 отсто од акциите. Компанијата има уште 96 мали акционери домашни физички лица кои заедно поседуваат 43 отсто од акциите на компанијата. Тие акционери меѓусебе ќе поделат околу 123.000 евра дивиденда во бруто износ.

БИМ и изминативе две години подели по 30 евра дивиденда по акција на своите акционери. 

Р.Ф.