Илиевски: Поради притисок од власта ниту еден актуелен функционер не е опфатен со истрагата за Кочани
СДСМ на денешната прес-конференција, преку потпретседателот Методија Илиевски, ја продолжи серијата обвинувања во врска со трагедијата во дискотеката „Пулс“ во Кочани, посочувајќи нови наводи за вмешаност на полициски службеници и за прикривање од страна на власта.
Според Илиевски, Драган Казак Петрушев, сменоводителот кој бил на должност во кобната вечер, е вториот заштитен лик од страна на ВМРО-ДПМНЕ, по Панче Тошковски.
– Мицкоски и Коцевски се должни да објаснат зошто сè уште нема обвинение против Петрушев – рече Илиевски.
Тој праша дали навистина постои видео-снимка на која се гледа дека Петрушев, спротивно на процедурите, ги заклучува вратите на објектот и не дозволува излез на присутните. Дополнително, според СДСМ, наместо да ја спроведе контрола на „Пулс“ во 12:30 часот – како што налагала наредбата – Петрушев контролата ја спровел доцна, откако забавата завршувала.
– Родителите бараат одговори речиси три месеци, а Обвинителството не го опфаќа ниту еден актуелен функционер – изјави Илиевски.
СДСМ прашува и дали постоела комуникација помеѓу сопственикот на дискотеката и Петрушев, со цел контролата да се спроведе пред крајот на забавата, што наводно било договорено за да не се наруши профитот на локалот.
Според Илиевски, против Петрушев постои и друга постапка, за издавање службена тајна и контакти со криминални структури. Тој тврди дека Петрушев можеби е заштитен поради блискост со ВМРО-ДПМНЕ, како и поради поседување компромитирачки материјали за функционери од партијата.
– Зошто секогаш е присутен на протестите во Кочани во формален капацитет? Дали тоа е обид да се заплашат родителите на жртвите? – праша Илиевски, додавајќи дека постои сериозна опасност за влијание врз сведоци и уништување на докази.
СДСМ тврди дека институциите под раководство на ВМРО-ДПМНЕ не ја испорачуваат правдата и најавува дека ќе продолжи со објавување, како што велат, на „вистината за трагедијата во Кочани“.
– Нема да дозволиме оваа трагедија да остане без одговорност – порача Илиевски.
