Иако бил 99% слеп пак добил возачка па со камион усмрти жена кај Неготино
Основното јавно обвинителство Кавадарци поднесе Обвинителен акт против 61-годишен маж кој, и покрај тоа што имал утврдена попреченост со 99% намалена видна функција (слепило), управувал товарно моторно возило и усмртил пешак на регионалниот пат Пепелиште–Неготино.
Несреќата се случила на 3 декември 2024 година, кога обвинетиот, без важечка возачка дозвола, возел „Ситроен џампер“ со велешки таблички. На местото викано „Лаки“, тој со ретровизорот ја удрил во главата 61-годишната пешачка Ангелина Ангелова, која по ударот била отфрлена од патот. Според вештачењето, таа добила тешки повреди – скршеници на черепот, вратните пршлени и други коски – од кои починала на самото место.
Во текот на истрагата, обвинителството прибавило медицинска документација која покажува дека обвинетиот бил корисник на инвалидска пензија поради слепило, но сепак продолжил да управува возило. Уште пострашно, тој успеал да ја продолжи возачката дозвола и по несреќата, иако неговата попреченост била официјално регистрирана.
Поради сериозноста на случајот, обвинителството побара од ОВР Неготино да ги провери начините на добивање и обновување на возачката дозвола, како и веродостојноста на медицинската документација со која обвинетиот користел и инвалидска пензија и управувал возило.
Случајот отвора сериозни прашања за контролата на институциите во процесите на издавање на возачки дозволи и признавање на инвалидитет. Обвинетиот се товари за тешки дела против безбедноста во сообраќајот, според членовите 300 и 297 од Кривичниот законик.
