ИЈЗ: Пад од 3,2 отсто на новозаболени од грип

Во текот на изминатата недела во земјава се евидентирани 1.113 случаи на грип и заболувања слични на грип, што претставува благо намалување во однос на претходниот извештаен период.

Според податоците на Институт за јавно здравје, во периодот од 16 до 22 февруари бројот на нови случаи е намален за 3,2 проценти во споредба со неделата претходно.

Најголем дел од новозаразените – 621 лице – се на возраст од 15 до 64 години. Кај децата од 5 до 14 години регистрирани се 185 случаи, додека 164 се кај најмалите, на возраст од 0 до 4 години. Кај лицата над 65 години пријавени се 143 случаи. Највисока инциденца од 169,9 на 100.000 жители е забележана токму кај децата до четиригодишна возраст.

Најмногу заболени се пријавени во Скопје – 669 случаи, по што следуваат Струмица со 81, Прилеп со 61 и Тетово со 50 случаи. По 37 случаи се регистрирани во Гевгелија и Охрид. Во повеќе други градови бројот на заболени е под 30, додека во Крушево, Валандово, Крива Паланка, Демир Хисар, Берово, Кочани, Ресен, Виница, Делчево и Пехчево не се пријавени случаи на грип или заболувања слични на грип.

Од почетокот на сезоната 2025/2026, вкупниот број регистрирани случаи достигна 14.984, а досега се евидентирани четири смртни случаи асоцирани со грип.

Заклучно со минатата недела, во државата се вакцинирани 79.118 лица.