ИЈЗ: Охридското Езеро со „одличен“ квалитет на вода за капење

Сите 96 примероци на површинска вода земени од 39 локации долж Охридското Езеро во периодот од 20 мај до 17 јули годинава ја исполнуваат највисоката категорија – I класа, покажува најновиот извештај на Центарот за јавно здравје Охрид. И според микробиолошките параметри, водата на сите плажи е оценета како „одлична“, што значи дека езерото е безбедно за капење, рекреација и спортови на вода.

Мониторингот опфатил целиот крајбрежен појас – од Св. Наум до с. Радожда, со редовни санитарно-хигиенски увиди и лабораториски анализи. Иако квалитетот на водата е на највисоко ниво, во извештајот се нотира присуство на потенцијални загадувачи, како објекти кои не се приклучени на колекторскиот систем, септички јами во селските населби, испусти на фекални води преку атмосферската канализација и недоволно прочистување на отпадните води во Св. Наум.

Меѓу препораките за задржување на „одличниот“ квалитет се целосно поврзување на сите објекти на колекторскиот систем, редовно чистење на путекс-постројките, техничко решение за приклучување на населбите од Струга до Радожда, како и чистење на коритата на реките кои се влеваат во езерото.

Според здравствените власти, моменталната состојба на Охридското Езеро овозможува безбедно користење на водата за капење и други рекреативни активности, но потребна е постојана превенција за да се избегнат ризици од загадување.