И Македонија во домет на иранските ракети – израелската армија објави мапа со потенцијалната теоретска опасност
Израелските одбранбени сили (IDF) објавија карта на социјалната мрежа Х (поранешен Твитер) на која се прикажани концентрични кругови што го илустрираат ракетниот домет на Иран. Според оваа илустрација, територијата на Македонија се наоѓа во поширокиот домет до 2.000 километри, што ја става земјата во теоретска опасност доколку дојде до ескалација на конфликтите.
„Иран не му се заканува само на Израел – тој е глобална закана. Израел е само почеток, не и крајна цел“, соопшти израелската војска, оправдувајќи го воздушниот напад врз Иран што беше изведен синоќа во рамки на операцијата „Лавот се буди“ („Operation Rising Lion“).
Цел на нападот биле повеќе од 100 мети, меѓу кои и нуклеарниот комплекс Натанс, централно постројување за збогатување ураниум. Премиерот Бенјамин Нетанјаху изјави дека целта на операцијата е „да се неутрализира егзистенцијалната закана“ која доаѓа од иранската нуклеарна програма.
Картата предизвика дополнителна контроверзија поради неточни или погрешно прикажани граници – како што е примерот со тоа што БиХ добила дел од Јадранското Море на сметка на Хрватска. Поради ваквите неточности, IDF се извини со појаснување дека се работи за илустрација, а не за геополитички точна мапа.
„Оваа објава е илустрација на регионот. Картата не ги прикажува прецизно државните граници. Се извинуваме за секоја можна навреда“, се наведува во соопштението на IDF.
