Хорор на железничката станица во Њу Делхи: Најмалку 15 лица загинаа во стампедо
Најмалку 15 лица загинаа, а 10 се повредени во стампедо на железничка станица во Њу Делхи, јавуваат индиските медиуми.
Очевидци изјавија за Би-Би-Си Хинди дека „огромна толпа“ се собрала на станицата, каде што многумина патувале до и од хиндуистичкиот верски фестивал Кумб Мела.
Индискиот премиер Нарендра Моди изрази сочувство, велејќи дека неговите мисли се „со сите оние кои ги изгубиле своите најблиски“ во објава на платформата X.
Надлежните соопштија дека ситуацијата сега е под контрола.
Д-р Риту Саксена, заменик медицински надзорник на болницата Лок Најак во Њу Делхи, изјави за АФП дека може да потврди 15 смртни случаи во нејзината болница.
Ројтерс јавува дека меѓу загинатите има три деца и 10 жени.
Очевидецот Руби Деви изјави за Би-Би-Си Хинди дека толпата била толку голема што таа не можела да влезе во станицата, додавајќи дека ситуацијата е „како стампедо“.
Друг сведок изјави дека полицајците си ја вршеле работата, „но дека гужвата станала преголема“.
Индиските железници првично ги отфрлија тврдењата за стампедо како „гласини“, според Ројтерс, но подоцна потврдија дека неодреден број луѓе биле повредени и пренесени во болница.
Инцидентот доаѓа неколку недели откако десетици луѓе загинаа во стампедо рано наутро на фестивалот Кумб Мела во северна Индија, каде десетици милиони Хиндуси се собраа да се капат во светите води на реката на најсветиот ден од шестнеделниот фестивал.
