Хаос во Германија: Напади врз полицијата, запалени автомобили во Лајпциг

Во раните попладневни часови во јужните делови на Лајпциг беа запалени неколку автомобили и контејнери за отпад, за кои се верува дека се дел од левичарски екстремисти кои и покрај забраната се собираат во Лајпциг за поддршка на неодамна осудената левичарка Лина Е. Таа оваа недела беше осудена на долга затворска казна поради организирање физички напади врз припадници на екстремната десница.

Ноќта од петокот кон саботата во повеќе делови од градот имаше судири меѓу припадниците на екстремната левица и полицијата. Според полициското соопштение, во тие судири биле повредени дваесет припадници на полицијата.

Во саботата попладне, Уставниот суд во Карлсруе ја отфрли итната акција на левичарските активистички групи за поништување на одлуката на повисокиот управен суд во Саксонија, кој го забрани протестот поради страв од напади и судири меѓу левичарите и полицијата и закана за јавниот ред и мир.