Хаос и блокади низ Македонија, револт поради одземањето возила – Мицкоски најави жесток одговор на „дивеењето“
Бран протести и сообраќајни блокади ја зафатија земјава изминативе 24 часа. Револтот на група граѓани е насочен против новиот систем на МВР, „Безбеден град“, и засилените контроли кои резултираа со високи парични казни и одземање на возила.
Ситуацијата на терен ескалираше со палење гуми, закани за убиства и нарушување на јавниот ред и мир.
Најкритично беше во Струмица, каде транзитниот пат кај Ромското маало беше под целосна блокада. Учесниците во протестот, кои во живо се снимаа на социјалните мрежи, не го криеја својот гнев кон полицијата. Дел од снимките содржат и застрашувачки пораки упатени до органите на редот.
„Од полицијата немаме против. Некој ако ми земе возило, да знаете, ќе има и тепачки и убиства“, порача еден од учесниците.
Слични сцени беа регистрирани и во Штип, каде мораше да интервенира и територијалната противпожарна единица за да ги изгасне пламените јазици на блокираните улици, како и во Кочани.
По синоќешните инциденти, денеска со остра реакција се јави премиерот Христијан Мицкоски. Тој информираше дека веќе остварил разговор со министерот за внатрешни работи Панче Тошковски од кога побарал бескомпромисно спроведување на законот.
„Она кое што го побарав од него е оној што го прекршил законот, упатувал закани, јавно упатил закани и го загрозил мирот и безбедноста на граѓаните – жестоко да се одговори. И ќе биде одговорено жестоко за да не се повтори она дивеење од синоќа“, дециден е премиерот Мицкоски.
Протестите доаѓаат во период кога МВР започна со помасовно санкционирање на сообраќајните прекршоци преку системот за видео-надзор „Безбеден град“. Додека властите тврдат дека целта е поголема безбедност на патиштата и ставање крај на неказнивоста, дел од граѓаните сметаат дека мерките за одземање возила се престроги и удар врз нивниот егзистенцијален опстанок.
