Хамас објави дека на Црвениот крст му предал 20 заложници
Палестинската исламска организација Хамас, која владее во Појасот Газа, доцна вечерва соопшти дека на Црвениот крст му предала 13 Израелци и седум странци, вкупно 20 заложници.
Заложниците ќе бидат префрлени од Појасот Газа во Египет преку граничниот премин Рафах, а оттаму во Израел, пренесоа израелските медиуми.
Во канцеларијата на портпаролот на израелската војска беше потврдено дека 13 израелски заложници се во рацете на Црвениот крст и дека се на пат кон преминот Рафа. Таму ќе ги пречекаат израелски претставници.Израелските медиуми потоа објавија дека 13 израелски и четворица, а не седум странски заложници влегле во Египет од Газа.
Меѓу ослободените има осум израелски деца и пет израелски жени, соопшти портпаролот на Министерството за надворешни работи на Катар, Мајед ал Ансари, земјата која посредуваше во договорот за четиридневното примирје во војната меѓу Израел и Хамас.
Врз основа на договорот, планирано е ослободување на најмалку 50 заложници, киднапирани на југот на Израел на првиот ден од војната, 7 октомври и однесени во Газа, за 150 палестински затвореници од израелските затвори.
Примирјето стапи на сила во петокот наутро и на тој ден беа ослободени 13 Израелци за 39 палестински затвореници. Ослободени се и десет киднапирани Тајланѓани и еден Филипинец.
Хамас денеска го одложи ослободувањето на заложниците, тврдејќи дека Израел не ги почитува условите од договорот.
Катар и Египет се залагаат за продолжување на ослободувањето на заложниците, а американскиот претседател Џозеф Бајден разговараше со катарскиот емир Тамим бин Хамад ал Тани, барајќи од него да го надмине доцнењето во спроведувањето на договорот и да изврши притисок врз Хамас.
Во меѓувреме, околу 100.000 луѓе протестираа во Тел Авив повикувајќи на враќање на сите заложници од Газа.
Во нападите на Хамас на југот на Израел во Појасот Газа беа земени околу 240 заложници, а беа убиени над 1.200 луѓе, главно цивили. Во израелското бомбардирање на Газа и последователната копнена офанзива, загинаа речиси 15.000 Палестинци, меѓу кои и околу 6.000 деца.
