Хамас го одложи ослободувањето на израелските заложници!
Вооруженото крило на Хамас до понатамошно известување го одложи планираното ослободување на израелските заложници, што требаше да биде извршено во сабота, објави портпаролот на групата преку Телеграм.
Хамас пред два дена ослободи тројца заложници од Газа, додека Израел ослободи 183 палестински затвореници и затвореници како дел од петтата размена на затвореници во рамките на кревкиот прекин на огнот кој трае веќе три недели.
Сепак, појавата на тројцата ослободени израелски затвореници ја шокираше израелската јавност и предизвика револт и неверување. Од друга страна, многу од ослободените палестински затвореници биле исто така екстремно слаби, а седум од 43-та морале да бидат хоспитализирани, според Клубот на палестинските затвореници.
Напредокот во последните фази од преговорите се чини ограничен. Денеска беше објавено дека израелската делегација, која отпатува во Доха за време на викендот за да преговара за следната фаза од примирјето во Газа, се вратила во земјата, бидејќи расте сомнежот за процесот со посредство на Египет и Катар.
Портпаролот на бригадите Ал Касам Абу Обеида го обвини Израел за прекршување на договорот.
„Во текот на изминатите три недели, раководството на отпорот ги надгледуваше непријателските прекршувања и непочитувањето на условите од договорот, вклучително и одложувањето на враќањето на раселените лица во северниот дел на Појасот Газа и нивно таргетирање со гранатирање и пукање“, рече Обеида.
Тој додаде дека „примопредавањето на ционистичките затвореници, кои требаше да бидат ослободени во сабота на 15 февруари 2025 година, ќе биде одложено до понатамошно известување, додека окупацијата не ги исполни условите и ретроактивно не ги надомести пропуштените недели“.
„Ние сè уште сме посветени на договорот, но само доколку окупацијата ги исполни своите обврски“, рече Обеида, според Гардијан.
