Групната фаза ѝ се лизга од раце на Струга: Брејдаблик со победа си замина од Охрид!
Стружани како никогаш досега во историјата на македонскиот фудбал немал полесен противник, по име и рејтинг, за разлика од претходните европретставници кои во плејоф во Европа добивале ривали како Милан, Лацио, Фенербахче, но македонскиот првак не ја искористи шансата на домашниот терен за да обезбеди макар минимална предност, иако имаше свои шанси, двапати рамката од голот беше сојузник на Исланѓаните, па на крај пресуди „прошетката низ одбраната“ на Хоскулдур Гунлаугсон во 35-та минута.
Откако Бесарт Ибраими погоди еднаш во дирекот, а ВАР на Бунјамин Шабани му поништи гол поради прекршок врз гостинскиот голман, Гунлаугсон се прошета низ одбраната, мина четворица домашни фудбалери и потоа со прецизен удар го матира Ведран Ќосевски за водство на Брејдаблик, кој претходно исто така погоди еден дирек.
Стружани во вториот дел повторно притиснаа, се обидуваа да дојдат до погодок, макар за да останат непоразени и двомечот да остане на еднакви шанси, но сите обиди завршуваа или во рацете на голманот на гостите, или пречката беше сојузник, откако Хакан Укпа од зицер позиција погоди само во рамката од голот на 15-на минути пред крајот.
Струга притискаше со сите сили, се обидуваше од секоја можна позиција да даде гол, ама две минути во судиското надополнување Ванѓел Згуро беше исклучен за втор жолт картон, па сите надежи потоа пропаднаа откако остана македонскиот првак десеткуван на теренот.
После овој пораз, Струга сега нема друга опција за седум дена освен да го освои Исланд ако сака групна фаза, иако ќе биде двојно потешко од овој воведен меч и Брејдаблик сега ја презема фаворитската улога, а овој исландски првак сезонава веќе испиша една историја како прв клуб кој успеал да мине редовно коло во квалификациите за ЛШ, а влегол како претквалификант во летната авантура.
Не успее ли Струга во својата намера, Македонија ќе остане со само едно учество на македонски тим во групите на УЕФА и тоа на Вардар од 2017 година, кога беше испишана историја.
