Груби има две опомени за користење службено возило, се чека Џафери да одлучи каква мерка ќе изрече

Вицепремиерката за политики за добро владеење Славица Грковска по новинарско прашање дали ќе поведат постапка по допрен глас за политичарите кои со службени возила се потпишувале за претседателските кандидати, истакна дека кога има докази дека е прекршен Етичкиот кодекс е постапено, а досега не бил добиен доказ.

„Досега не сме добиле фактичка состојба да видиме со аргумент дека е тоа така. Знаете дека и досега секогаш кога сме имале аргументи и доказ којшто укажува на тоа дека е прекршен Етичкиот кодекс сме постапиле, без разлика на тоа за кого станува збор. Така ќе биде и во овој случај. И токму како предупредување испративме пред извесно време отворено писмо до јавноста, до сите политички субјекти, без разлика на тоа на кое ниво на власт се, дека треба да водат сметка за јасно разграничување на партиските и државните активности и да нема злоупотреба на државни ресурси и капацитети за време на политичка кампања“, изјави Грковска.

Таа откри и дека вицепремиерот Артан Груби имал две опомени за користење службено возило, и се очекува премиерот Талат Џафери да одлучи која е мерката што ќе ја изрече.

„Сакам да укажам на тоа дека само за еден случај, само за случајот Артан Груби, сме дошле до ситуација после две опомени заради непостапување сме пратиле допис до премиерот којшто треба, според Етичкиот кодекс, да одлучи која е мерката што ќе ја изрече. И повторно ќе кажам треба да се најде законско решение“, изјави Грковска.