Грозданов: Стоп на романтичарството кое ни носи сиромаштија и нереални имагинации
Стоп на романтичарството кое ни носи сиромаштија и нереални имагинации како функционира едно општество, порачува во својата последна колумна, машинскиот инженер и колумнист, Виктор Грозданов во која ги анализира последните поместувања во светската политика во однос на рударството и минералните суровини.
„Во геостратегиските ситуации се поизвесно е кој е победник, а кој поразен ама во енергетска и рударска смисла. Американците им ги отстапуваат рудниците на истокот од Украина на Русите и таму вредноста не е во милијарди ниту пак во трилиони, напротив во трилиони милијарди евра. За возврат Русија се откажува од своите инвестиции за нафта и нафтени производи од земјите кои се под интерес на Американците. Таков пример имаме во нашето соседство со Нафтената Индустрија на Србија која што и да направи во наредниот период, добрите познавачи на овој бизнис предвидуваат загуба од еден милион евра дневно. Затоа Србија носи закон со кој што се овозможува да вложи 1.4 милијарди евра во НИС и да постави свое раководство“, пишува Грозданов.
Потсетува дека држави како Шведска, Грција работат веќе на големи рударски проекти кои треба да ја снабдуваат Европа со клучните минерални суровини и да ја направат независна од Кина. Но, во Македонија, според Грозданов, и покрај големиот потенцијал со рудно богатство, за што пример го посочува проектот за рудникот за бакар „Иловица – Штука“, се уште не се преземаат конкретни чекори да се искористи тој потенцијал и да се стави државава на геостратешката мапа кога станува збор за минералните суровини.
„Експертите веќе ги потврдуваат количините на злато, ама она што е најважно таму има огромни количини на бакар, кој Европската Унија го прогласи за стратешки метал. За овој рудник почетната инвестиција е 350 милиони евра и директни и индиректни вработувања од 3.500 лица на територијата на струмичката котлина. Или пак само од процентот за концесиски надомест во општините Босилово и Ново Село каде е лоциран рудникот годишно би се слевале од 10.5 милиони евра, а од оваа сума 10 проценти или во евра 1.05 милион евра годишно за заштита на животната средина согласно новото законско решение. На потег е државата дали ќе комуницира со научно-образовани професори од областа на геологијата, рударството, металургијата и макроекономијата кои јас ги нарекувам личности со Висок Интелектуален Потенцијал или со несоодветно образовани личности спремни за еколошки манипулации кои немаат претстава како да ја напишат хемиската формула за водата“, вели Грозданов во колумната.
