Град Скопје го отвора процесот за креирање на буџетот за 2026 година со максимална транспарентност
Градот Скопје годинава го започнува процесот на креирање на буџетот за 2026 година со посебен акцент на транспарентност, отчетност и вклученост на јавноста. Целта е граѓаните, организациите и заедниците активно да придонесат во формирањето на буџетот и да ја враќаат довербата во институциите.
„Буџетот не е само финансиски документ, туку стратегија која се гради врз реалните потреби, предизвици и визија за иднината на градот“, истакнува градоначалникот Орце Ѓорѓиевски.
Во својата изјава, градоначалникот го повикува целото население, невладиниот сектор и бизнис заедницата да учествуваат во процесот: „Вашите потреби, ставови и идеи ќе бидат основата врз која ќе го градиме овој важен документ. Верувам дека со отворено партнерство ќе создадеме стабилна основа за долгорочен развој и силно, достоинствено Скопје.“
Процесот веќе доби голем број конструктивни предлози од граѓаните, но учеството останува отворено за секого кој сака да даде свој придонес.
Во новиот буџет ќе бидат опфатени и приоритетни капитални проекти, особено во делот на инфраструктурата, културата, спортските содржини и животната средина. Целта е да се олесни секојдневието на скопјани и да се подобри квалитетот на живот во градот.
Градот Скопје ја потврдува заложбата дека дијалогот со граѓаните ќе остане во центарот на сите процеси и дека секоја конструктивна идеја ќе биде земена предвид при креирањето на буџетот за 2026 година.
