Грозданов: Екологијата не е шоу, туку наука
За управување со отпад, тема која бара длабоко разбирање и мултидисциплинарен пристап, зборуваат луѓе без никакви релевантни квалификации, додека вистинските експерти се изоставени , забележува во својата последна колумна металуршкиот инженер и колумнист, Виктор Грозданов.
„На национални медиуми, на теми кои бараат стручна анализа и одговорен пристап, повторно доминираат еднострани дебати. Наместо научна аргументација – гласност и сензационализам. Најшокантно беше тоа што за управување со отпад, тема која бара длабоко разбирање и мултидисциплинарен пристап, зборуваат луѓе без никакви релевантни квалификации. Самонаречени „екологисти“ кои на јавноста и продаваат страв, а не знаење.Од друга страна, вистинските експерти – професорите, инженерите, научниците – повторно остануваат исклучени. Зошто? Прашање на кое одговорот веројатно го знаат само организаторите на таквите дебати. А ние, јавноста, можеме само да претпоставуваме – и да гледаме како најважните теми за иднината на земјата стануваат медиумски спектакл, наместо простор за вистинска стручна расправа“, пишува Грозданов.
Грозданов порачува дека сите оние кои се наоѓаат во изборна кампања треба да слушаат научници посебно на оваа тема од практични причини.
„Научниците кои се грижат за животната средина не шпекулираат, напротив не создаваат теми за разговор по медиуми и заблудување на нацијата туку даваат конкретни решенија“, вели Грозданов.
Ова, смета тој, треба особено да се има предвид кога се зборува за теми како екологија, енергетика и рударство.
