ГРОМ: Одлуката на АВМУ за исклучување на Левица од покривање на трошоците за медиумско претставување во кампањата за локалните избори е скандалозна и недемократска

Граѓанската опција за Македонија (ГРОМ) во соопштение до медиумите реагира на одлуката на Агенцијата за аудио и аудиовизуелни медиумски услуги (АВМУ) со која политичката партија Левица е исклучена од покривање на трошоците за медиумско претставување во кампањата за локалните избори.

Од ГРОМ сметаат дека станува збор за скандалозна и недозволива одлука, имајќи предвид дека Левица е парламентарна и опозициска партија. „Во држава која е членка на НАТО и кандидат за членство во Европската Унија ваквите чекори не придонесуваат за унапредување, туку за ограничување на демократските капацитети и создавање систем својствен за други времиња и општества,“ се наведува во реакцијата.

ГРОМ посочува дека целта на државното финансирање на медиумските кампањи е да им се овозможи простор и на помалите партии и независни кандидати, со што би се поттикнал плурализмот и би се зајакнала демократијата, а граѓаните би имале поголема понуда и можност за вистински избор.

„Владејачката партија секојдневно го узурпира медиумскиот простор, користи милионски средства од државата за финансирање и за рекламирање. Со ваква медиумска доминација и елиминација на политичките противници на нечесен начин, нема да се подобри животниот стандард, правната држава, безбедноста, ниту бизнис-климата, туку уште повеќе ќе дојдат до израз празните ветувања,“ стои во соопштението.

ГРОМ додава дека целта е да се остварат добри изборни резултати, но во услови на фер и чесна политичка конкуренција. „Ова е само предвесник на настаните што ќе следат на овие локални избори, во обид на власта по секоја цена да ја задржи контролата врз локалната самоуправа, каде што нема остварено реални резултати,“ се заклучува во реакцијата.