Грција ќе го гради најголемиот деловен центар во областа на логистиката во Југоисточна Европа
Во Грција ќе се гради најголемиот „паметен“ и „зелен“ логистички центар во Југоисточна Европа, објави грчкиот сајт „Нафтемборици“.
Грчкиот министер за развој Костас Скрекас најави дека индустриската област Триасио до главниот град на Грција Атина ќе стане еден од најмодерните логистички паркови во Европа.
Паркот ќе има 42.000 квадратни метри терминален простор за контејнери, 5.740 метри железнички пруги, 165 паркинг места за камиони, како и фотоволтаични единици од 10 мегавати со систем за складирање од 7 мегавати.
Според Скрекас, ова е проект кој „ќе ја воспостави Грција како транзитен логистички центар од меѓународно ниво, нудејќи пристап до најсовремена дигитална инфраструктура и иновативни решенија за автоматизација на магацините“ и ќе придонесе за развојот на грчката економијата.
Во проектот ќе бидат инвестирани 220 милиони евра и преку него ќе се отворат илјадници работни места, додаде министерот за развој.
Ова ќе биде втора по големина приватна инвестиција во префектурата Атика, Централна Грција, истакна извршниот директор на трговскиот центар Триасио, Василис Мангларас. Според него, проектот „ќе се развива на модерен и одржлив начин за општеството, економијата и животната средина, за да и служи на развојната перспектива на земјата“.
