Градоначалникот на Благоевград „ќе ги казни“ вандалите кои го искршија македонскиот клуб, како што надлежните ги казниле полицајците на Деве Баир
Двајцата мажи кои ги приведе бугарската полиција за каменувањето на македонскиот клуб „Никола Вапцаров“ во Благоевград биле вработени во општинското претпријатие „Озеленување“.
Имено, според информациите во бугарските медиуми, тие се пуштени од притвор откако признале вина.
Градоначалникот на Благоевград, Илко Стојанов, под чија надлежност е јавното претпријатие каде работеле лицата, на саркастичен начин вели дека ќе ги казни.
„Така мислам дека е просто и праведно. Кога во Македонија ќе ги казнат граничарите, граничната полиција и службениците и сите кои предизвикаа гужва на границата на денот кога требаше да се даде почит на Гоце Делчев и кога ќе ги избркаат тие службеници, јас веднаш ќе ги отпуштам моите службеници. Рецпипрочност на казнувањето“, порача тој.
