Граѓаните со блокади: Со колите заработуваме за леб, државата да ни овозможи усно полагање
Бранот протести на граѓаните од ромска националност денеска се прошири со блокади на клучните патни правци кај Плетвар и на излезот од Битола кон Ресен.
Демонстрантите бараат итно укинување на законските измени за одземање на возилата доколку се управуваат без возачка дозвола, посочувајќи дека овие мерки директно ја загрозуваат нивната егзистенција.
Учесниците во протестите нагласуваат дека старите возила, кои често чинат по неколку стотици евра, им се единственото средство за работа. Со нив тие преживуваат собирајќи отпадно железо и пластика или вршејќи такси превоз до населбите каде што редовните такси-служби одбиваат да возат.
„Ние од тие коли живееме. Имаме по 4-5 деца, плаќаме струја и вода. Ако ни ја земат колата, остануваме дома гладни“, порачаа демонстрантите од Плетвар.
Главниот проблем за многумина од постарите припадници на ромската заедница е немањето завршено основно образование, што е законски услов за добивање возачка дозвола. Демонстрантите бараат државата да најде начин да им овозможи полагање на оние кои се неписмени, но знаат да возат.
Се предлага воведување на усно тестирање за лицата кои не знаат да читаат.
Бараат дозвола за управување возила и без завршено училиште, со образложение дека „имаат појако искуство во главата отколку самата дозвола“.
Демонстрантите велат дека за возачите кои пијат или користат дрога треба да следува затворска казна, но возилото да не се конфискува бидејќи со него се храни целото семејство.
Протестите кои денеска предизвикаа сообраќаен колапс на патот Прилеп–Градско и Битола–Ресен нема да запрат. Граѓаните најавуваат дека блокадите ќе продолжат и во текот на утрешниот ден, сè додека не бидат повикани на разговор со надлежните за да се најде решение за нивните барања.
