Гостивар го запечати пласманот во Прва лига, Вардар и официјално ќе игра – бараж!
Гостиварци кои дојдоа до 22-та победа и сезонава се единствените непоразени на едно коло пред крајот на сезоната, ниту административно загубените три бода од „случајот Гордијан Христовски“ на стартот на овој втор дел од сезоната не ги спречи да дојдат до место во Првата лига.
Денеска прашање беше само со колку разлика ќе победат, а Борец добро е што си заминува со само четири парчиња во мрежата, откако Антонио Каланоски даде два, а по еден Виктор Крстевски и Фисник Зука. Каланоски имаше шанси да ги наполни, трипати погоди пречка, имаше чисти зицери за контото на голови да го зголеми.
Вардар го освои последниот бод за математички да го осигура баражот во кој најверојатно ќе игра против Скопје, откако на Маџари, двата најголеми македонски брендови одограа возбудлив меч на тешкиот терен поради дождот, но успеаа да дадат само по еден гол, за битолчани недоволен, додека за црвено-црните завршен за заверка на третото место.
Дарио Десниќ после половина час игра со прекрасна мала мајсторија погоди за водство, но седум минути во вториот дел Христијан Вецевски направи пенал врз Бојан Спиркоски, па Борче Маневски реализираше за израмнување. Пелистер имаше голем зицер после еден час игра, но битолчани ја прокоцкаа најзрелата шанса за пресврт, а потоа Дарко Размоски се реваншираше со промашена одлична можност за победа на Вардар десетина минути пред крајот.
Пелистер фрли сѐ на една карта да дојде до победа и да ги остави надежите за баражот сѐ уште живи, но не успеа да ја скрши цврстата дефанзива на црвено-црните и со тоа останува второлигаш втора сезона по ред.
За идната сезона во Првата лига неизвесно е само последниот патник, тој од баражот, додека 11-те други прволигаши се познати – Струга ТЛ, Шкупи, Шкендија, Силекс, Македонија ЃП, Брегалница, Работнички, Тиквеш, Воска Спорт и Гостивар. Останува само Академија Пандев која е поблизу до сигурен опстанок и математички тоа да го верификува, а потоа Скопје и Вардар да го дадат последниот прволигаш за идната сезона.
