ГОСТИТЕ ОСТАВААТ КОМЕНТАРИ ЗА ХОТЕЛИТЕ И АПАРТМАНИТЕ КОИ ГИ ПОСЕТИЛЕ: Сопствениците ги читаат и еве што велат…

Оние кои
добиваат резервации од туристи преку booking,
велат дека ги читаат мислењата на
посетителите и за нив е важно да имаат добри препораки.

Туристите на booking
oставаат коментари за хотелите,
вилите и апартманите во кои престојувале. Ја оценуваат хигиената, услугата,
љубезноста на персоналот, дали сместувањето вреди за парите, локацијата на
сместувачките капацитети, паркинг просторот, опкружувањето, храната и слично. Гостите на
англиски или на својот мајчин јазик го опишуваат престојот во хотелите. Некои
оставаат само скромен коментар, но има и такви кои описно објаснуваат какво
искуство имале со конкретен сместувачки капацитет. Има пофалби и критики и
истите влијаат за тоа дали некој следен гостин ќе одлучи да се смести во
одреден хотел. Некои од посетителите наведуваат по една позитивна и една
негативна работа која им оставила впечаток.  Од хотелите велат дека мораат да учат нови
работи, да бидат во чекор со времето и да се прилагодуваат на потребите на
гостите.

„Ние ги читаме
коментарите. Тие се добри, луѓето се задоволни. Имаме туристи од САД, Кина,
Бугарија, од секаде и мораме да се прилагодуваме“, велат од хотел во Струга.

Истото го прават
и газдите на сместувачки капацитети во другите туристички места.

„Јас лично ги
читам коментарите. Луѓето се генерално искрени. Реагираа за тротоарот, ама сега
е среден, направен. Битно е да имаме пофалби, имаме оценка 8.4 збирна. Ни
дојдоа гости од Србија, оставија добри коментари, и потоа дојдоа други туристи
исто од Србија и кажаа дека ги читале коментарите“, вели Томче Златановски од
вила „Ангел“ од Охрид.

На сите им е
важно да имаат што подобри оценки и да бидат добро рангирани.

„Ги читаме
мислењата на посетителите. Секако дека гледаме да коригираме ако за нешто има
поплаки. Не може на секој да му се погоди, некои пишуваат позитивно, повеќето
се задоволни, најбитно е да им е чисто. Во ек на сезона не може да се реновира,
за тоа ќе почекаме малку. Преку booking повеќе имаме странци, а помалку домашни гости“, додаваат од апартмани од
Крушево.

На туристите им е
важна хигиената, но и локацијата каде се наоѓа објектот.

„Јас лично си ги
читам коментарите. Ако нешто можам да сменам и зависи од мене, го правам тоа.
Хигиената им е битна на посетителите, но и локацијата и сите оценки поединечно
ги гледаат на booking“, објаснуваат
од вила „Ирена“ од Крушево.

Од коментарите
може да се види дека туристите го фалат и персоналот ако е љубезен и
пријателски расположен, сакаат места каде плажата ќе им биде близу, но да нема
многу врева, да има добра интернет конекција и слично.

Сања Атанасовска

foto freepik.com