ГОЛЕМ СКОК НА ЦЕНИТЕ НА НАФТАТА: Побарувачката за „црното злато“ ќе расте
Цените на нафтата скокнаа за околу 4 отсто минатата недела, враќајќи ги загубите од претходната недела, благодарение на проценките дека побарувачката за „црното злато“ може да се зголеми. На лондонскиот пазар цената на барелот минатата недела порасна за 4 отсто, на 85,34 долари, додека на американскиот пазар цената на барелот порасна за 3,9 отсто, на 81,04 долари.
Зголемувањето на цената на лондонскиот пазар над 85 долари, првпат од ноември минатата година, следеше по проценките на Меѓународната агенција за енергија (ИЕА) дека глобалната побарувачка на нафта ќе се зголеми за 1,7 милиони барели дневно во првиот квартал.
Зголемувањето на проценките на побарувачката се должи на подобрената економска перспектива во САД и зголемената побарувачка за гориво, но дополнително е поттикната поради кружењето на бродовите кои сега патуваат подолго поради проблемите во Суецкиот канал.
ИЕА, исто така, ја зголеми својата проценка за растот на побарувачката за целата година, за 110.000 барели дневно, на 1,3 милиони барели дневно. Но, тоа значи дека растот ќе биде значително побавен од 2023 година поради забавувањето на светската економија.
