Година на странски туристи: Туризмот во Македонија со раст од 6% – Мицкоски: Целта ни е да стигнеме до пет милиони преноќувања
Македонскиот туризам минатата година бележи вкупен раст од 6.0 % во споредба со 2024 година, покажуваат најновите податоци на Државниот завод за статистика. Овој позитивен биланс се должи пред сè на значителниот прилив на странски туристи, чиј број пораснал за 10.3 %, додека кај домашните посетители е забележан пад од 2.2 %.
Сличен тренд се забележува и кај бројот на ноќевањата, кој на ниво на цела година е зголемен за 0.8 %, приближувајќи се до бројката од 3.5 милиони преноќувања. Статистиката регистрира раст на ноќевањата кај странците од 6.4 %, додека кај домашните туристи е евидентирано намалување од 4.1 %.
Во декември 2025 година се евидентирани околу 60.000 туристи, при што доминирале странските гости со учество од 63.3 %. Најголем број од нив пристигнале од Турција, Бугарија и Србија. Во истиот месец биле остварени вкупно 112.001 ноќевања.
Премиерот Христијан Мицкоски, коментирајќи ги овие резултати, истакна дека туризмот останува еден од врвните приоритети на Владата.
„Она коешто посебно охрабрува е двоцифрениот раст на странски туристи од над 10%. Целта ни е да стигнеме до пет милиони преноќувања, што би претставувало историски рекорд. Како Влада сме проактивни, работиме на поддршка за изградба и реновирање на сместувачките капацитети и очекувам 2026 година да донесе уште поголем раст,“ изјави Мицкоски.
Тој додаде дека за тековната година повторно се очекуваат организирани групи странски туристи, со што ќе продолжи трендот на зајакнување на овој сектор како значаен придонесувач за економскиот развој на државата.
