Го одбележуваме Меѓународниот ден на трудот, на улиците протест и барања до идната Влада
Денеска го одбележуваме Меѓународниот ден на трудот кој е посветен на борбата за зачувување и унапредување на правата на работниците.
Во Македонија овој ден ќе биде одбележан со протест и барање до новата Влада.
Сојузот на синдикати денеска ќе упати барања за пораст на платите во приватниот и во јавниот сектор, минимална плата во износ од најмалку 450 евра во првите 100 дена од новата влада, исплата на трошоците за храна во висина од 20 проценти од просечната плата и исплата на трошоците за превоз.
Тие ќе бараат и ограничување на работата на определено време во исклучителни околности и на максимум една година, право на неработна сабота и зголемена контрола на прекувремената работа, намалување на полното работно време на 35-часовна работна недела и укинување на 72-часовната работна недела на стратешките проекти.
Протестот ќе почне пред Работничкиот дом, ќе продолжи пред Собранието и Стопанската комора и ќе заврши пред Владата.
