ГЕРМАНИЈА ЗАПОЧНУВА „ОФАНЗИВА“: За што се работи?
Министерот за финансии Ларс Клингбеил во Германија најави големи државни инвестиции. Според него, Германија започнува „офанзива“.
„Веќе почнавме со пренамена на вонредните средства и имаме намера силно да ги зголемиме инвестициите на околу 110 милијарди евра оваа година“, рече Клингбеил.
Според него, станува збор за инвестиции од основниот буџет и дополнителни инвестиции од фондот за вонредни состојби и фондот за клима и транзиција (KTF).
„Сакаме да постигнеме видливи промени за луѓето кои работат напорно и кои со право очекуваат нашата земја да функционира подобро“, додаде министерот за финансии.
Неговото министерство објави дека инвестициите ќе се зголемат за 50 проценти оваа година во споредба со лани.
Фондот за клима и транзиција треба да се зајакне и тој главно ќе финансира програми што придонесуваат за заштита на климата.
Двата дома на германскиот парламент, Бундестагот и Бундесратот, усвоија одлука за итен фонд финансиран од заеми со рок на отплата од 12 години. Неговата цел ќе бидат дополнителни инвестиции во инфраструктура и заштита на климата.
Ова вклучува, на пример, рехабилитација на железничката мрежа и мостовите, како и училиштата. Клингбеил најави сеопфатни структурни реформи.
Буџетот ќе продолжи да биде строго консолидиран. Владата треба да го усвои до 25 јуни.
