Германија се помалку привлечна за експерти и претприемачи
Германија станува сè помалку атрактивна за странските експерти и претприемачи, покажува денеска објавената студија на фондацијата Бертелсман и ОЕЦД.
„На листата од 38 земји-членки на Организацијата за економска соработка и развој (ОЕЦД), во последните години, Германија падна од 12-то на 15-то место во однос на атрактивноста за странски експерти и претприемачи кои имаат намера да лансираат старт-ап компании“, се вели во студијата на фондацијата Бертелсман.
„Низок степен на прифаќање на странци“
Наведените причини се проблеми со дигитализацијата, премногу бавно издавање визи и високи пречки за стекнување државјанство, а со тоа и долгорочна перспектива за останување. Во студијата се наведува и „ниско ниво на прифаќање на странци“ во Германија.
„На Германија и требаат странски експерти за да обезбеди просперитет, а меѓународната споредба покажува што Германија треба да направи за да ги привлече овие експерти“, рече директорот на фондацијата Бертелсман Ралф Хек за време на презентацијата на студијата во Берлин.
Втора најатрактивна за странски студенти
Во студијата, Германија беше оценета како добро само кога станува збор за привлечноста за странските студенти. Во однос на ова, Германија е на второ место, зад САД, а како предност се наведуваат квалитетните универзитети и ниските трошоци за студирање.
Сојузната влада подготвува реформа на законот за имиграција што треба да ја направи Германија поатрактивна за странските работници.
Според досегашните податоци на Сојузниот завод за вработување, во Германија моментално се непополнети околу 1,8 милиони работни места.
