Германија ги ублажи правилата за стекнување државјанство, ги укина ограничувањата за двојно државјанство

Германскиот парламент денеска усвои закон за олеснување на правилата за државјанство и укинување на ограничувањата за двојното државјанство, што според владата ќе ја поттикне интеграцијата на имигрантите и ќе помогне да се привлечат квалификувани работници.

За усвојување на законот предложен од владејачката коалиција на канцеларот Олаф Шолц гласаа 382 пратеници, против беа 234, а воздржани 23.

Водечкиот опозициски блок, кој го сочинуваат конзервативните демохристијански партии, остро го критикуваше усвојувањето на законот со кој се овозможува право да се добие државјанство по пет години поминати во Германија, наместо претходните осум, односно по три години наместо шест. во случај на „посебни интеграциски достигнувања“.

Според законот, децата родени во Германија автоматски стануваат државјани доколку едниот родител бил законски жител во таа земја најмалку пет години, за разлика од претходните осум години.

Се укинуваат и ограничувањата за поседување двојно државјанство. Во принцип, повеќето луѓе од земји кои не се членки на Европската унија и од Швајцарија, до сега мораа да се откажат од своето претходно државјанство при добивањето германско, иако имаше одредени исклучоци.

Владата наведува дека 14 отсто од луѓето во Германија, повеќе од 12 милиони од 84,4 милиони жители, немаат германско државјанство, а околу 5,3 милиони од нив живеат во Германија најмалку десет години.

Во 2022 година, околу 168.500 луѓе добија германско државјанство, најмногу во една година од 2002 година, делумно поради големиот пораст на бројот на натурализирани сириски граѓани кои пристигнаа во Германија во изминатата деценија.