ГЕРМАНЦИТЕ ИМ ПОМАГААТ НА АМЕРИКАНЦИТЕ ВО ОДБРАНАТА НА ЦРВЕНОТО МОРЕ! „Продолжување на ескалацијата на насилството, оваа мисија е неопходна“
Германија се приклучи на одбраната на Црвеното Море.
Германската влада го одобри учеството на германските вооружени сили во мисијата „Аспид“ на Европската унија, чија цел е да ја заштити поморската рута во Црвеното Море од нападите на Хутите од Јемен, беше објавено во петокот. „Постојаната ескалација на насилството и заканата по животите на екипажите на трговските бродови ја прави неопходна воена мисија“, рече заменик портпаролот на германската влада Волфганг Бухнер на редовната владина прес-конференција во петокот.
Германската фрегата „Хесен“ со екипаж од 240 членови пред десетина дена веќе исплови од пристаништето Кил за да им се придружи на сојузничките сили во морето кај Јемен. Одлуката на германската влада следната недела треба да ја потврди и Бундестагот каде мнозинство имаат владејачките партии. Следната недела министрите за надворешни работи на земјите членки на Европската унија треба да дадат конечно зелено светло за мисијата.
Бродовите од мисијата на ЕУ, за разлика од бродовите на САД и Велика Британија кои веќе учествуваат во мисијата „Посејдон Арчер“, нема да учествуваат во нападите на паравоените позиции на Хутите на копно, туку ќе ги заштитат бродовите од проектили. Фрегатата „Хесен“ е специјално опремена за придружба и заштита на бродови.
