„Гардијан“: На одлуката за апсење на Путин му е потребна поддршка
Одлуката на Меѓународниот кривичен суд (МКС) да издаде налог за апсење на рускиот претседател Владимир Путин има потреба од поддршка, пишува британски „Гардијан“ во уводникот.
Сосема е веројатно дека Путин никогаш нема да преземе одговорност за злосторствата. Сепак, самата можност тоа да се случи, во одредена смисла, доби поконкретни контури откако минатата недела Меѓународниот кривичен суд издаде налог за негово апсење, врз основа на обвинувањата за депортација на деца од Украина во Русија.
Огромните докази за депортацијата на илјадници деца кои се дадени на посвојување или испратени во „логори за превоспитување“ се шокантни. Сепак, ова е само еден од многуте ужаси што Путин и ги нанесува на Украина. Се погласни се повиците рускиот претседател да биде кривично гонет за самата инвазија, а за таа цел е неопходно формирање на специјален трибунал, бидејќи Меѓународниот кривичен суд не се занимава со гонење на кривичното дело „агресија“. Ваквите повици се делумно упатени затоа што вообичаено е тешко, ако не и невозможно, за иследниците за воени злосторства да докажат дека политичките водачи го овластиле извршувањето на воените злосторства. Врската помеѓу Путин и случаите на депортација на деца, сепак, може јасно да се докаже. Минатиот месец рускиот омбудсман за правата на децата, Марија Лвова-Белова, која исто така имаше налог за апсење издадена од МКС, се појави на телевизија и му се заблагодари на претседателот што „посвоил“ 15-годишно момче од Мариупол. Ова е почеток на случајот против Путин, но не мора и крај, истакнува британското издание.
Засега, налогот за апсење е повеќе вознемирувачки за Путин отколку реална закана или пречка за него. Русија не е членка на Римскиот статут, според кој е основан МКС, и не ја признава нејзината јурисдикција. Сепак, наредбата може да влијае на способноста на Путин да патува, бидејќи теоретски земјите кои ја признаваат јурисдикцијата на МКС може да го уапсат доколку стапне на нивна територија. Дополнително, ако Путин падне од власт, правдата може да го стигне, како што го фати и Слободан Милошевиќ, пишува „Гардијан“.
Сепак, МКС не може сам да успее. Потребна ѝ е поддршка која не е ограничена на неговото зголемено финансирање. Судот има 40 истражители во Украина. Сепак, се вели дека владата на американскиот претседател Џо Бајден ја блокира соработката со МКС за Русија, бидејќи стравува дека може да се направи преседан што би можел да се искористи за гонење на Американците во иднина.
