ГАК со демант: Случајот со смртта на бебето се истражува согласно протокол
ЈЗУ Универзитетската клиника за гинекологија и акушерство денеска демантираше информации објавени на порталот „Слободен печат“ на 15.12.2025 под наслов: „Скандал на ГАК: Сомнителна смрт на бебе скриена од семејството – педијатарка го реинтубирала 20 минути“.
Во соопштението се нагласува дека Клиниката е акредитирана терцијарна установа со најголем број породувања и со современо одделение за интензивна нега на предвреме родени деца. Клиниката располага со стручен кадар – педијатри, неонатолози и среден медицински персонал – кој секојдневно се грижи за новородените пациенти.
„Наводите во објавениот текст се шпекулативни и упатуваат на лекарска грешка при лекување на новородено бебе“, велат од Клиниката. Се додава дека во случај на смрт на новородено бебе се постапува согласно законски пропишан протокол, кој предвидува разгледување на случајот од комисијата за квалитет. Во овој конкретен случај комисијата не утврдила пропуст во третманот, а обдукцијата – која е единствен и конечен доказ за утврдување на причината за смртта – сè уште не е завршена.
„До добивање на наодот од обдукцијата, Клиниката не смее да превземе понатамошни чекори во случајот. Секое претходно толкување на можниот исход претставува прејудицирање“, велат од Клиниката.
Во однос на пријавата за наводно несоодветно однесување на докторка, Клиниката истакнува дека веднаш е постапено согласно препорака на началничката на одделението, а вработената е прераспределена на друго работно место.
„Ја разбираме потребата за сензационализам, но таа не смее да биде поголема од потребата да се дознае вистината. По настанувањето на случајот, преземени се сите мерки и постапки за објективна истрага, нештитејќи никого. Ако се утврди лекарска грешка, ќе бидат преземени најстрогите мерки“, соопштуваат од ГАК.
Клиниката исто така изразува сочувство до семејството за загубата на новороденото и апелира до јавноста да не се шират дезинформации кои можат да создадат дополнителен немир.
