Габриела Илиевска се врати во Советот, но како граѓанка – „Не ми треба фотелја за да ве контролирам“
Невообичаена слика денеска во салата на Општина Битола. Габриела Илиевска, доскорешната претседателка на Советот и лидер на „Поинаку“, се појави на седницата за носење на Буџетот за 2026 година, но овој пат не од говорницата, туку од делот за публика.
Иако не е дел од новиот советнички состав, Илиевска порача дека нејзината политичка борба не завршува со функцијата и дека ќе биде „сенка“ на новата власт.
„Имам обврска кон 8.000 битолчани“
Илиевска, која на октомвриските избори направи историски успех освојувајќи второ место со 21,80% од гласовите (околу 8.000 гласа), истакна дека не мора да биде платена функционерка за да се грижи за народните пари.
„Ова ми го налага обврската што ја имам како некој што добил поддршка од 8.000 граѓани. Не мора некој да има политичка функција, да биде платен од граѓаните и да користи државни пари, па само тогаш да се грижи како се трошат парите… Моето присуство тука ќе биде континуирано во интерес на Битола“, изјави Илиевска.
„Поинаку“ расте, но мнозинството ги одбива
Независната иницијатива „Поинаку“ во овој мандат е посилна од кога било, со 4 советници (во претходните мандати имаа два, па три).
Сепак, на денешната седница нивната сила се судри со ѕидот на новото мнозинство – сите нивни предлози за дополнување на дневниот ред беа експресно отфрлени.
Потегот на Илиевска да седне во публика се толкува како порака дека „Поинаку“ ќе врши силен притисок и од внатре (преку советниците) и од надвор (преку граѓански активизам).
Фото СДК.мк
