ФРАНЦУСКИТЕ ЗЕМЈОДЕЛЦИ ГНЕВНИ НА ПАТОТ КОН ПАРИЗ: Запираат камиони со странска стока и ја палат

Француските
земјоделци денеска почнаа да ги уништуваат увозните земјоделски производи,
испорачани со камиони од други земји, а дел од нивните барања се регулирање на
нелојалната конкуренција, како и намалување на даноците.

Според
извештаите, земјоделците запираат странски камиони на автопатот А7 кај
Монелимар, и ја палат и ја расфрлаат стоката, јавува БФМ ТВ.

Друга група
земјоделци формираа конвој трактори рано утринава на главниот пат RN12 во
близина на Париз, додека демонстрантите се закануваат дека масовно ќе дојдат во
Париз.

Земјоделците во
Франција, земјата која е и најголем производител на земјоделски и прехранбени
производи во ЕУ, истакнуваат дека од една страна не се доволно платени и дека
се задушени од прекумерната регулатива како дел од заштитата на животната
средина.

Тие повеќепати
како одговор на овие протести нагласија дека се загрижени дека правилата, во
комбинација со поевтиниот увоз, ќе ги задушат, проблем што го делат со
земјоделците ширум континентот.

Според
земјоделците, иницијативата на француската влада и трговските синџири да се
справат со поскапувањето на храната ги остава во незавидна положба и им
оневозможува на многумина да се справат со високите цени на енергијата,
ѓубривата, транспортот итн.

Што се однесува
до поевтините увезени производи, француските земјоделци прво вперуваат прст кон
Украина, каде што ЕУ се обврза да увезува производи со големи квоти, како и
трговскиот договор меѓу ЕУ и Меркосур (јужноамериканскиот блок), сомневајќи се
дека ќе создаваат нелојална конкуренција на пазарот на месо, житарици и шеќер.
Дополнително, тврдат дека не мора да подлежат на новите еко-правила.

На еколошки план,
земјоделците ги преиспитуваат правилата на ЕУ за субвенции кои бараат 4 отсто
од земјиштето да остане необработено, и ова го гледаат како прекомплицирана
имплементација на политиките на ЕУ во Франција, како што е обновувањето на жива
ограда и обработливото земјиште како природно живеалиште.

Се вели дека
зелената политика се заснова на контрадикторните цели секоја земја да се
направи самодоволна во производството на храна и други стоки.

ФОТО: EPA