ФОТО Рекорден интерес за спорт во „Идризово“: Над 200 осуденици учествуваа на турнири во фудбал и пинг-понг
Во Казнено-поправната установа Идризово се одржаа турнири во фудбал и пинг-понг, кои предизвикаа масовен интерес меѓу осудените лица.
На спортските натпревари учествуваа вкупно 224 лица, што според официјалните податоци на Управата за извршување на санкции, претставува најбројно учество на еден организиран настан во овој затвор во последните две децении.
Организирањето на вакви спортски активности е дел од редовната програма за работа во КПД Идризово. Целта на овие настани е преку спорт и рекреација да се поддржи процесот на ресоцијализација на осудените лица и да се подобри квалитетот на секојдневниот престој во установата.
Од Управата за извршување на санкции посочуваат дека масовноста на овој турнир е позитивен сигнал за успешноста на програмите кои се насочени кон ангажирање на осудениците во корисни и здрави активности.
