ФОТО Повторно масовно труење на животни во Битола
Градот Битола повторно е потресен од вознемирувачки случај на масовно труење на улични животни. Утрово, зад старото Аурум, пронајдени се пет отруени кучиња, што предизвика голема загриженост кај граѓаните и здруженијата за заштита на животните.
Труењето на животни е сериозно кривично дело, казниво според член 233 од Кривичниот законик. Покрај нехуманоста кон животните, ова претставува и сериозна закана за јавната безбедност, бидејќи отровот е исклучително опасен и за децата и домашните миленици кои може да дојдат во контакт со него.
Активистите и граѓаните апелираат до надлежните институции – Општина Битола, МВР, ЈП „Комуналец“ и Државната ветеринарна инспекција – веднаш да излезат на терен. Се бара да се соберат примероци за анализа и да се преземат сите неопходни мерки за да се откријат и казнат сторителите на ова грозоморно дело.
Ова не е првпат Битола да се соочува со ваков проблем, што укажува на системски недостатоци и потреба од построги мерки за превенција и казнување. Граѓаните се прашуваат како во 21 век, во еден урбан град, сѐ уште се случуваат вакви варварски чинови.
