ФОТО Мистериозни броеви на оклопите на желки во Преспанското Езеро
Истражувачи од Македонското еколошко друштво (МЕД), при редовни теренски активности на островот Голем Град во Преспанското Езеро, откриле дека најстарите шумски желки имаат врежани броеви на долниот дел од оклопот – пластронот.
Според МЕД, ознаките не одговараат на ниту еден современ метод за идентификација на животни и најверојатно се направени пред неколку децении. „Врежаните бројки не изгледаат како скорешни и веројатно датираат барем 30 години, а можеби и повеќе од 50 до 70 години. Останува нејасно дали станува збор за поранешна научна активност или за неформално следење од биолози-аматери или други лица“, наведуваат од друштвото.
И покрај разговорите со локални жители и консултациите со колеги, потеклото на ознаките останува непознато.
Голем Град е познат по една од најгустите и најнеобични популации на шумски желки во светот, но таа се соочува со сериозни предизвици – нарушен полов сооднос и негативни ефекти од климатските промени. Од МЕД нагласуваат дека само преку заеднички научни истражувања и утврдена методологија може да се утврдат мерки за нивна заштита.
Од друштвото ги повикуваат граѓаните кои имаат информации за вакви ознаки или забележале желки со слични броеви во Преспа и околината да ги контактираат.
