ФОТО Блесна црквата „Св. Константин и Елена“ во Скопје, по 13 години изградба наскоро свечено отворање
Вечерва, по цели 13 години градилиште и лимени тараби кои го нарушуваа изгледот на улицата „Македонија“ во центарот на Скопје, црквата „Св. Константин и Елена“ конечно почна да блеска и е подготвена за свечено отворање.
Осветувањето на храмот ќе се одржи на 28 септември, а светата литургија ќе започне во 8:30 часот. Чинот на осветување ќе го изврши поглаварот на МПЦ-ОА, г.г. Стефан, во сослужение со архиереите на Македонската православна црква.
„Поканет е државниот врв, дипломатскиот кор, стопанственици, претставници на локалната самоуправа, медиуми, како и сите верници кои сакаат да присуствуваат на овој торжествен чин,“ велат од Скопската епархија на МПЦ.
Изградбата започна во 2012 година, со средства обезбедени преку донаторски конференции на кои учествуваа политичари, бизнисмени и владици. Финансиските потешкотии го пролонгираа проектот, кој траеше цели 13 години.
Храмот „Св. Константин и Елена“ сега ја добива заслужената завршница и ќе стане значаен духовен центар во срцето на Скопје.
